Kinagisnan ko na ang bawat umagang kasama ka
kasalo sa pagkain at pati na rin sa mga tawa
sa bagong timplang kape na kasing init ng pagmamahal mo
ikaw, ang araw na nagpapaliwanag ng buhay ko
Lumipas ang mahabang panahon na kapiling ka pa
ang dating almusal natin, ngayon ay pananghalian na
kasalo na ang mga supling na pinangarap natin
ikaw, ang siya pa’ring nagpapasaya sa akin
Sumapit ang dapit hapon ng ating panahon
kasabay ng mga alaalang kinubli’t ibinaon
Noo’y mga mumunting supling ay unti-unti na ring nawala
Hapunan na, Mahal
pero bakit lumisan ka?
Isang almusal nalang
para muling mapagsaluhan
ang bawat umagang kinagisnan,
ikaw mahal, ang araw na nagpapaliwanag
ang siyang nagpapasaya,
sa huling dapit hapon ng aking panahon.