kya kabhi tumne gham ko rote dekha hai..
Kya kabhi maa ko sukoon se sote dekha hai!
kya dekha hai kabhi sapno ko bikharte hue...
ya dekha ho kabhi parindo ko zameen pe chalte hue!
Kya Dekha hai kabhi waqt ko fisalte hue...
ya mehsus kiya ho kabhi ret ko hath me theherte hue!
kya kabhi dekha hai apnon ko bichhadte hue...
ya dekha ho anjano ko milne ki koshish karte hue!
Kya Dekha hai dariya ko Sagar se milte hue...
ya Dekha ho kabhi samandar me Kamal khilte hue!
kya Dekha hai kabhi ashqon ko aankhon mai chhupte hue...
ya Dekha ho kabhi hanshini ko jaate dekh hansh ko rukte hue!
Kya Dekha hai kabhi raat ko din se milte hue...
ya Dekha ho kabhi murjhaai kali ko fir khilte hue!
Kya Dekha hai kabhi zajbaaton ko zehen me chhupte hue...
ya Dekha ho kabhi bujurg maa k lye bete ko uthte hue!
Kya Dekha hai kabhi samandar ko khara hote hue...
ya Dekha ho kabhi janta se pareshaan neta ko rote hue!
Kya Dekha hai kabhi kisi ko sapno ka sauda karte hue...
ya Dekha ho kabhi maa k dil se bachhon ka auhda jhinte hue!
Kya Dekha hai kabhi taaron ko sote hue...
ya Dekha ho kabhi samandar kinare sukha hote hue!
Kya Dekha hai kabhi nanhe se kaano ko maa ki Lori sunte hue...
ya Dekha ho kabhi kisi pari ko tumhare sapne bunte hue!
Kya Dekha hai kabhi hasin lamhon ko yaad bante hue...
ya Dekha ho kabhi Ameer haathon ko fariyad karte hue!
Kya Dekha hai kabhi benaam rishton ko bante hue...
ya mehsus Kiya ho kabhi ruh ki saansein thamte hue!
Kya Dekha hai kabhi seher ki pehli Kiran ko khilte hue...
ya Dekha ho dharti or aasman ko milte hue!
Kya Dekha hai kabhi ek boond ko baadh m badalte hue...
ya Dekha ho kbhi nashe m chur insaan ko khud samhalte hue!
Kya Dekha hai kabhi pita ko beti ko dafnate hue...
ya Dekha ho waqt ko, kahin peeche chhut gae maazi ko apnate hue!
Kya Dekha hai kabhi raja ko rank bante hue...
ya dekha ho muqaddar ko hunar se upar ank ginte hue!
Kya Dekha hai kabhi kisi ko akelepan ka lutf uthate hue...
ya mehsus Kiya ho kabhi doston sang bitaye palon m dar ko aate hue!
Kya Dekha hai kabhi pehle pyaar Mai khud ko badalte hue...
ya kisi kareeb ko kho Dene par jhat se samhalte hue!
ye saari wahi sachhai hai, jisey dekhkar bhi hum undekha kar jaate hai...
or ye hai wo jinke hone ki jhoothi ummeed k saath hum aagey badh aate hain!!
-"Tiara"