الحلقة الأولى
حاولت كتير أكلمك عن الحجات إللى جوايا بس كل مرة كنت بحس فى حاجة بتمنعنى .. فضلت سنين على اعتقادى انك كنت معجب بيا بس فى الآخر طلعت ما تعرفش حتى اسمى ايه ولا انا مين .. طول الفترة دى و انا عايشة بقارن نفسى بالناس إللى حواليك عشان كان نفسى أكون فى يوم من الأيام منهم و اتعرف عليك لدرجة إنى مابقتش شايفة نفسى و لا بقيت فاكرة احلامى
بس اعتقد جه الوقت إنى اخود فترة راحة من الإرهاق النفسى إللى انا سببته ليا و اراجع الفترة دى كلها على بعضها .. مش عايزة افضل فى مقارنة بينى و بين الناس إللى حواليك .. مش عايزة ابقى شخصية مشهورة عشان خاطر اجذب انتباهك و تحبنى ..
صدقنى حتى مابقتش عايزة اتعرف عليك ولابقيت حابة الصدفة إللى خلتنى أقابلك .. سلام :) "
بهذه الكلمات انهت داليا إحدى قصص الحب التى لم تولد إلا فى خيالها فقط .. كان من المؤسف ان تكون اولى كلماتها له هى آخرها , لكنها على الرغم من هذا شعرت كأنها بدأت تتنفس لأول مرة منذ سنوات .. فهى كانت تعرف جيداً ان لا احد سيحبها كما هى لكنها كانت تخشى المواجهة .. فها هى الآن قد بدأت اولى خطوات المواجهة و تقبل حقيقة الأمر .
عرفت داليا وقتها انها رغم بساطتها و نقائها إلا انها هتفضل غريبة فى نظر الناس لأنها كانت منطوية و منعزلة فى اغلب الأوقات , كل مشكلتها أنها مختلفة عن بنات كتير فى سنها عايشة دايماً فى خيالها , أقصى طموحها تعرف هى مين و عايشة ليه , تعرف إللى بيميزها عن غيرها مش عايشة و السلام ..
افتكرت للحظة ان مفيش مرة اعجبت بحد و طلع بيبادلها نفس الشعور لدرجة انها اتعودت على كدا .. غمضت عنيها عشان تحاول تنسى كل لحظة اتخذلت فيها , حاولت تطبطب على قلبها و تقنعه ان ربنا أكيد مخبى حاجة حلوة قدام
و قررت داليا فى اليوم دا انها بعد ما انهت الماضى إللى فضلت متمسكة بيه كتير فى خيالها ,, انها هتحاول ترجع لحياتها الطبيعية و تشغل نفسها عشان تبتدى فى طريقها الطويل لتحقيق أول حلم ليها إللى مرضتش تقوله لأى شخص لحد ما فعلا تبدأ تحققه
قامت بسرعة جابت ورقة وقلم كعادتها و بدأت تفكر اززاى هتوصل لحلمها .. عارفة انه محتاج فلوس كتير و لازم تبدأ تشتغل بمرتب كويس عشان تعرف تجمع الفلوس لمشروعها دا .. بس افتكرت انها لسة فى تانية هندسة و لسة قدامها وقت محترم أعبال ما تتخرج و تشتغل بشهادتها , اينعم اهلها كانوا ممكن يساعدوها بمبلغ كويس عشان مشروعها بس هى كانت مصممة انها هى إللى عايزة تحقق حلمها من غير مساعدة , فكرت ساعتها ان مفيش حاجة هتخليها تشتغل بسرعة و بمبلغ محترم غير انها تبقى متميزة فى مجالها .. و عشان تحقق دا لازم تتعب كتير على نفسها خلال الفترة دى تتعلم و تاخود كورسات و تنزل تتدرب و تعلم نفسها بنفسها و ممكن تشتغل اى شغل جانبى لحد ما تتخرج و تسعى و ماتخليش حاجة تانية بعد كدا تعطلها أو تشوش تفكيرها
وعدت نفسها انها مش هتشغل قلبها بأى حد مهما كان و مهما عمل لأنها فى الأول و الآخر عارفة إللى فيها و عارفة انها هتضيع وقتها تانى على مفيش .. قررت تقفل على قلبها و تبتدى تطور من نفسها و حياتها لأن مفيش حاجة دلوقتى تستحق تعبها غير حلمها و بس ..
بس مش دايما كل حاجة بتمشى زى ما الواحد كان مخطط
يتبع ..