Pipiliin kita
Katulad ng pagpili ko sa kape tuwing umaga.
Kung saan pantay ang tamis at pait —
Dulot mo'y natatanging init.
Pipiliin kita
Katulad ng pagpili ko sa pantalon
na ipapares sa paborito kong damit.
Kung saan ang higpit ng sinturon ay di alintana,
Sapagkat sapat ka lang para sa akin sinta.
Pipiliin kita
Katulad ng pagpili ko sa isang kanta.
Paulit ulit kong pakikinggan hanggang gabi,
Kung saan hahayaan kong patulugin ako
ng mga lirikong binuo ng bawat letra
ng pangalan mo.
Pipiliin kita
Katulad ng pagpili ko sa mga salitang bumubuo sa tulang ito.
Kung saan ang mga puwang sa pagitan
ng bawat berso ay pupunan mo.
Sapagkat ikaw ang pinakamagandang
paksa na kayang kong ikwento.
Pipiliin kita
Katulad ng pagpili ko sayo.
Kung saan sa kabila ng milyon-milyong pagpipiliang
nakalatag sa harapan ko,
Ikaw parin ang pipiliin ko.
Pipiliin kita.