Ek chahat ankahee si
Subha ki kirane aur thandi si dil ko chune wali hawaye,radio pe bajte sune ansune geet, dopahar ko chupke se dastak dekar jhoom ke barasne wale badal aur raat ko un badaloin se jhankta hua wo pyara sa chand..
Kuch pyare se dost aur meri kitaab “jazbaat”… jazbaat han ek kitaab ka nam kuch ajeeb malum hota hai par kya karu khayaloin me jeena aata hai khayaloin ko hakikat banana aata hai…aur wahi khayal mere is kitab me kaid hain…
Ye kahani meri kitaab “jazbaat” se...
kaya mere pados me rehti thi umra laghbhag 7 ya 8 saal. Bauht choti thi jab maine use dekha tha kuch 5-6 mahino ki rahee hogi meri god me aakar bauht khush ho jaya karti thi, uski mummy jab uska rona band nahi krwa pati thi to mujhe bula liya karti thi. Aur mujhe dekh kar uske chehre pe pyari si hasee khil jaya karti thi aur meri bhi din bhar ki thakan uski muskaan dekh kar mano gayab ho jati thi…
Badi hokr chulbuli si ho gayi thi mummy papa ko pareshan krke rakhti thi..par usme aisa kuch tha jo uski umra ke baki bacho se bauht alag tha..kuch family problems ki wajah se uske parents ne uska school me admission nahi krwaya tha..uske papa ek choti si dukan par kam kiya karte the aur mummy house wife thi...shehar bhi koi zyada bada nahi tha sadak par bhi zyada log nazar nahi ate the..
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Maine bhi waha ek chota sa ghar kiraye pe liya hua tha...job mere pas thi nahi to wahan rehkar maine kitab likhna shuru ki thi..is profession ke liye isse achi jagah aur kahin nahi ho sakti thi..Meri family nahi thi ek orphanage me rahi thi fir ek rich family ne mujhe adopt kiya tha.. papa mummy dono bauht pyar karte the jaise jaise badi hui mere khayal un logo se alag hone lage.. mujhe na to paise ka nasha tha aur na shauhrat ki chahat.. Papa mummy se ijazat li aur apni life khud banana ki ijazat lekar ghar se nikal gayi thi..struggle ke bad ek job mili par waha bhi meri nahi bani…kuch samay aise hi beeta fir ek letter aya jisme mere mummy papa ki death ki news thi us khabar ne mujhe puri tarah tod diya tha..papa apne sari property mere nam kar gaye the.. bas usi ke dam par meri zindagi kat rahi thi meri pehli kitab maine apne papa mummy ko dedicate ki thi aur us kitaab se mera bauht nam bhi hua tha par nam to mujhe kabhi chahiye hi nahi tha…wo kitab likhne tak meri zindagi ka maksad mujhe nahi pata tha… par wo kitab jis din publish hui uske kuch din baad mere name ek letter aur aya tha usme likha tha
ki “shauharat tere naseeb me kabhi thi hi nahi isliye tune ise hmesha thukraya hai par ek bat hmesha yad rakhna ye jab milti hai to zindagi ban jati hai aur jab nahi milti to…”
khat bhejne wale ka nam kahin nahi likha tha ek anjan khat aur adhuri si baat
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Kaya school to jati nahi thi to har subha sham mere ghar aya karti thi khelne ke liye, apni pyari pyari batoin se mera dil behlaya karti thi..aam ka ek ped hua karta tha mere angan me wo use bauht pasnd tha maine uske liye waha ek jhoola dal diya tha jab bhi ati thi us jhoole pe baith kar mujhe zor zor se bulaya karti thi aur jhula jhulane ko kaha karti thi..
Ek din mere hath pakad kar mujhe us ped ke peehce lekar gayi,maine dekha wahan ek gadda tha jise mitti dal kar band kar diya gaya tha maine pehle kbhi us jagah pe itna dhyan nahi diya tha..mera hath khinch kar boli ki “Aayat” ye mera secret place hai iske bare me maine kisiko nahi btaya hai aj tak tum pehli ho jise maine iske bre me btaya hai tum promise kro mujhse tum kabhi ise khol ke nahi dekhogi aur kisi ko iske bare me nahi bataogi..
Maine usse kaha ki jab tum nahi chahti ki kisi ko iske bare me pata chale to mujhe iske bre me kyu bata rahi ho..wo khilkhilakr hasee aur uchalti hui waha se bhag gayi ..
Bachkani harkat smajh ke maine bhi use halki si smile pas kar di..
Wo roz chupke se us ped ke peeche jaya karti aur kuch der bad jhoole pe baith kar mujhko bulaya karti ye silsila roz yunhi chala karta tha…
Ek din wo bauht khush thi subha subha mere darwze pe khadi chilla rahi thi
Aayat jaldi bahar aao…
Jaldi jaldi..
Mujhe tumko kuch dikhana hai..
Saari raat likhne ke baad meri neend puri nahi hui thi aur ankhein bhi nahi khul rahi thi jaldi se uth kar maine ankhoin pe pani dala aur darwaza khola..kaya mere samne khadi thi ek purana sa frock pehan kar,par uske chehre ki khushi aisi thi mano usko sab kuch jo usne chaha ho mil gaya ho..
dusre bache bahar khade usko dekh kar has rahe the..unki hasee pe wo bhi unke saath hasne lagi…mujhe neeche jhuka kar boli ki Aayat mujhe panch aam chahiye peeche wale ped se tum tod ke dogi na..
“Ye subha subha uski mere darwaze pe dastak ek purana sa frock pehan kar na khatam hone wali khushi aur mujhse panch aam mangna ye ek din ki baat nahi thi har saal aaj hi ke din ye kissa apne aap ko dohrata tha…”
Uski mummy ne mujhe bataya tha ki usko drawing ka bht shauk hai,wo roz drawing bnati thi par kya bnati thi kuch samajh nahi ata tha bachi thi bacho ki drawing to wahi jane,par jo bhi banati thi use bauht sambhal ke rakhti thi..uski mummy ne use drawing bnate hue to dekha tha par uski ek bhi drawing ghar me nahi milti thi..jane kahan chupa ke rakha karti thi..uski mummy ne usko ghar me hi pdhaya tha jitna wo pdha sakti thi…wo apna nam apne papa ka apni mummy ka aur mera nam likh liya karti thi aur kuch shabd the jo use likhna ate the…
Mere pas jab bhi aati to jhoola jhulte jhulte roz ek naya shabd seekh ke jati thi..aur mummy ko jakr batati thi..maine chaha uska admission school me karwa du par uske mummy papa ne mana kar diya,itna bada ehsaan kaise lega koi jisko kal ka khana milne ki ummed bhi naa ho…
Kaya thi jisko dekh kar mujhe lagta tha ki jo paise mere pas the unki kya keemat thi,sab hokar bhi kuch karne ke kabil nahi thi main..kaya ko dekh kar mujhe yad aata tha wo gumnam khat jo abhi tak adhura tha………
Maine apni kitab ko ek taraf karke Kaya ko padhana shuru kiya itne pyare pyare sawal kiya karti thi ki meri zindagi usse bandh si gayi thi jab kabhi bimar pad jaya karti thi to mera din guzre nahi guzarta tha..meri adat ban gayi thi ..kuch bure khayalo ko chupane ke liye maine kitab likhna shuru ki thi ab kitabo se mano duri si ho gayi thi...
Mujhse padh padh kar bauht kuch seekh gayi thi samay beet ta gaya aur kuch saal guzar gaye
Mera shehar “jazbaat” ab waisa nahi raha tha kuch pehle jaisa tha to sirf kaya uspe hasne wale wo bache, wo aam ka ped aur main…
Kaya ab 14 saal ki ho gayi thi..
Maine uske liye ek naya frock khareeda tha aur mujhko pura yakeen tha ki wo use dekh kar bauht khush hogi..use bula kar maine wo frock diya aur usse kaha ki kaya kal fir wahi din hai fir subha tum aaogi mujhse aam mangne ke liye..to subha uth kar ise khol kar dekhna..wo bauht khush thi uske chehre ki wo hasee meri ankhoin me bas gayi thi..jo khushi mujhe us din mili thi uske barabar koi khushi nahi thi..
Aaj fir wahi din tha wo fir darwaze pe khadi mujhe aawaz de rahi thi
Aayat uth jao jaldi,
Uth jao na please
Please jaldi utho aur chalo mere sath mujhe tumko kisi se milwana hai..
Uski aawaz me bht khushi jhalak rahi thi, maine khidki khol kar usko dekha to wahi apna ek purana sa frock pehne khadi thi aur chehre pe bauht pyari si muskaan thi uske, hmesha ki tarah baki bache usko dekh kar has rahe the aur use hamesha ki tarah koi fark nahi pad raha tha…
Ek pal mujhe bura laga dekh kar ki mera diya frock shayad use pasand nahi aya par uske chere ki hasee ne mujhe ye baat bhula di..
Maine khidki band karke darwaze ki taraf bhadna shure kiya…mere darwaze tak jane tak wo lagatar chilla rahi thi
Aayat jaldi aao jaldiiiii aur peeche bacho ki hasee ki awaze aa rahi thi..
Aakhri awaz jo mere kano me padi wo thi…
Aaaaayyyaaatttt……
Wo akhri aawaz dosto us awaz ne mere dil se kaha ki tu ab dhadak nahi payega aur agar dhadak saka to teri dhadkan ki awaze tujhe sunayi nahi dengi…
Us lamhe ki chuppi ne mere kadmo ko tham liya tha mere hath darwaze tak jane se inkar kar rahe the..
Kaya par hasne wale un bacho ki hasee ki awaz mere kano me nahi pad rahi thi, aur naa hi mera nam ab mujhe sunayi de raha tha…
Jaise taise dil ko samjha kar maine kadam aage bhadaye aur darwaza khola..
Sadak par din bhar khelne wale aur kaya par hasne wale un bacho pe meri nazar padi , itne salo me pehli bar maine un sab ko ek sath rote hue dekha tha,, mera dimag bht kuch keh raha tha par mera dil uski sunne ko taiyar nahi tha…
Meri nazar kaya ko dhunde lagi…rote hue un bacho me se ek bacha mera hath pakad kar mujhe le jane laga aur mujhe kaya ke pas le jakar khada kar diya…
Maine dekha use-- masum si hasee chehre par hathoin me mere diye hue gift ka box..jaise kuch bolna chahti ho…par uski batein ab adhuri reh gayi thi-- uski wo muskaan akhri muskaan thi …
Ek tez raftar truck ne use takkar mar di thi..uski dhadkane ab tham chuki thi
Meri kaya mujhse bauht dur chali gayi thi….mere kano me uske wo aakhri lafz goonj rahe the …..
Aayat jaldi aaaooo,,,,
Aayat jaldi aaaoooo,,,
Aayat…..Aayat…..
Apni god me utha kar maine usko uski maa ke hatho me diya, mere dil chahta tha usko main hamesha ke liye apne pas rakh lu…
Par zindai ka Dastoor hai…
Jo aya hai wo jayega zarur..
Aj agar roya to kal muskurayega zarur…
Kabhi dusro ki khushi me khush
Aur dukh me dukhi hokar dekhna…
Jo cheena khuda ne tujhse is lamhe ke liye…
Kisi lamhe me tujhko usse wo milwaeyega zarur…
Ek bar fir mera koi apna jo mere dil ke bauht kareeb tha mujhse dur ho gya tha…Hum sab ki zindagi fir andhere ke pehlu me kho gayi thi….Kaya ki maa mano jaise ek mitti ka putla ban kar reh gayi thi…uske papa chehre pe dikhate nahi the par uski yaad me akele baith kar roya karte the…
Maine bhi apni us adhi chodi hui kitab ko dobara likhna shuru kar diya tha…jis jhoole par baith kar kaya mujhse naye shabd nayi batein seekha karti thi wo jhoola ab mere khayalo ko shabd dene ka zariya ban gaya tha…us jhoole par baith kar meri kaya ke sath bitayi hui sare yadein taza ho jaya karti thi…
Kuch samay guzra meri wo kitab bhi publish ho gayi…uske kuch dino bad fir mere nam wo gumnam khat aya wahi likhawat ,wahi likhne ka andaz…aur us pure khat me bas ek choti si baat…
“Apna le shauhrat ko, kitaboin se tujhe kuch nahi milega…
Tere apne tujhse dur hote jayenge ,tu unki khwahishe kbhi puri ni kr payegi..”
Us khat me mujhe likhne wale ki zindagi shikayatoin se bhari malum hoti thi..jise apne apno ke liye karna bht kuch tha par gareebi shyd uske hath thame baithi thi…
Us khat ko maine smbhal ke rakha aur bahar angan me jhoole pe jakar baiht gayi..mausam ke mizaz bigde hue the hawae zoro par thi…mera dhyan kayak ki us ped ke peeche wali jagah par padi…
Socha ki dekhu akhir usme kya hai aisa..par uska wada mujhe yad aaya..aur maine apna man badal liya..
Agle din subha kaya ke papa ne kam par jane se pehle mujhe ek kagaz lakr diya aur kaha ki jab tumne kaya ko uski maa ko saunpa tha tab uske hath me ye kagaz mila tha… uspe mera nam likha hua tha wo writing kaya ki thi..maine wo kagaz khol ke dekha usme drawing bani hui thi….
Ek aam ka ped tha ek ladki us ped ke pas ek gadda kar rahi thi…us ladki ke photo par bhi mera hi nam tha…akhri bar bhi wo mujhse kuch kehna chahti thi par khuda ko wo manzur nahi thi…
Maine jakar us gadde ko khol kar dekha usme ek lakdi ka box tha…use khola to usme bauht sare panne pade hue the aur har panne pe drawing bani hui thi…aur har drawing me ek kahani…
Pehli drawing se lekar akhri drawing tak har drawing behtar hoti gayi thi..
Maine sabe pehla panna us box se nikala:
Uski pehli drawing jisme wo uski mummy aur papa the…dikhne me kuch khas nahi thi par dkh kar andaz lagaya ja skta tha..
Har panne me uski life ke kuch yadgar lamhe the,
Kisi me usko dekh kar hasne wale un bacho ka zikar, to kisi me mera usko aam tod kar dene ka…
Kisi me wo apna wo purana sa frock pehan kar kisi raste pe jaya karti to kisi me mere sath khil khilakr hasti….
Uski sari drawings maine dekhi jo sirf aur sirf khushi se bhari hui thi..
Us box me kuch drawing chupi hui si rakhi thi maine unko nikal kar dekhna shuru kiya…un drawing me ek aisi kahani thi jo apke aur mere zindagi ko dekhne ke dhang ko badal degi....
Dosto kaya ko kabhi shayd koi samajh hi nahi paya tha,, wo kya karti thi kya sochti thi koi nahi jan sakta tha…
**********************************************************************************
Ek drawing jo mere hath lagi uspe uske bday ki tareekh dali thi, wo uska 11th bday tha..us drawing me panch ladkiyo ki tasveer bani thi jisme se ek par kaya ka nam likha tha, aur bakiyo pr bhi un sbke nam likhe hue the…wo aise nam the jinka zikra na to kabhi kaya ne mujhse kiya na kabhi apne mummy papa se…
Wo drawing usme ek srf k ladki naya frock pehni thi aur bht khush nazar aa rhi thi , baki sari ladkiya fate purane kapdo me thi kaya bhi…usi drawin ke peeche wahi panch ladkiyan bth kar aam kha rahi thi..
Agli drawing par tareekh kaya ke 12th bday ki,is drawing me ab do ladkiyan naye frock me thi aur baki purane kapdo me aur sbhi baith kar aam kha rahi thi…
Yahi tasveer uske 13th bday ki thi bs fark itna tha ki ab teen ladkiyan thi jo naye frock me thi …
*************************************************************************************
Ab bari thi uske 14th bday ki wo bday jo uska akhri din tha hum sab k sath…
Us akhri drawing me wo charo ladkiyan naye frock me thi par usme aj kaya ki tasveer nahi thi…peeche palat kar mne dekha us drawing ko usme bs itna likha tha ki “ye mera sabse acha janam din tha...Aj sab khush hai aur main sabse zyada khush hu…us akri drawing me kaya wahi frock pehni hui thi jo mne use diya tha”
**************************************************************************************
Maine ye sari drawing kaya ki mummy ko btayi , unhone mujhe btaya ki jab bhi uske bday pr wo use naya frock lakr deti thi to kaya wo frock kabhi nahi pehnti thi kehti thi ki maa jab mera bday sbse acha hoga us din main ye frock pehnungi….kaya ki maa ki ankhein ansuo se bhar gayi wo mere gale lag kar zor se rone lagi….maine unse rone ki wajah puchi…
Unhone kaha ki mujhe maaf kardo ‘Aayaat’…maine tumhe un khatoin me bauht kuch likha jo shyd mujhe nahi likhna chahiye tha…main kya karti mjhe tumse nrzgi thi ki shauhrat chod kr tumne apni zindagi ek writer bn kr sbse dur reh kr guzari…tum chahti to bht logo ko khushiyan de sakti thi us shauhrat se….
Par aj meri kaya ne mujhe smjha diya ki paise se zindagi ko sirf asan bnaya ja sakta hai..khushi to sirf dusro ko khush krke hi milti hai…
*************************************************************************************
Ek nanhi si jaan aur ek aisa kam, jo shayad hum aur aap krne se pehle sochte hain ki agar hum apni hisse ki cheez dusre ko de denge to ye hmse zyada khush ho jayega…kabhi kisi ko khush krke dekhna dosto kya pata shayad tumhari khushi doguni ho jaye….
**************************************************************************************
Written By:
“RS”