I am pretty sure you all have heard about "love at first sight" par janab pyar to unhe bhi hota hai Jo dekh nahi sakte.. Kuch Jo keh nahi sakte aur kuch woh Jo sunn nahi sakte..
Aise hi hai kahani Gazal ki, kissi ne Gazal likhi to kissi ne Gazal suni..
To kissa kuch iss tarah se hai, wo roz apni gali se nikal ke mandir ko jaati, beech raste mai usse masjid bhi mil jaati, Azan sunke sheesh jhukati aur aage badd jaati. Aage chalti to school ki ghanti bhi sunn jaati, baccho ko shor sunke muskurati aur aage badd jaati. Chalte chalte nadi aajati, lehro ki dhun ke saath thoda wo bhi gungunati aur phir aage badd jaati. Yeh thi Gazal ki roj ki kahani, uske liye yeh thi Allah ki mehrbani...
Ek aur shaksh tha kuch kuch Gazal jaisa, hasmukh, chanchal, mast magan jaisa.
Roz Gazal KO jaate dekhta, usko u muskurate dekhta, dekhte hi dekhte usse Gazal se lagav ho gaya, Jo Gazal ki raah thi ab wo bhi uss raah ka rahagir ho gaya. Wo bhi roz mandir tak jaata, bass Gazal ke kadam se kadam milata...
Gazal ko bhi rahagir pasand tha, wo kuch kehti nahi par usse aitraaz nahi tha. Wo roz rahagir ki aahat sunti aur rahagir Gazal ke saath chalta. Dono ne buni thi yeh duniya, choti se par khamosh si, na Gazal kuch kehti na rahagir kuch sunta. Dono khush the par khamosh the, duniya wale inki khushi se pareshaan the.
Log bole yeh kaisa lagav hai, ek behre ko andhi se pyar hai? Kissi tarah dono ko sach batlaya gaya, unka pyar mumkin nahi aisa unhe yakeen dilaya gaya. Par janab ishq tha kaise bhool jaate, jitna door jaate agle din utna kareeb khud ko paate.
Dono ne akhir kaar pyar ki bhasha seekh li, gam ki raaton mai bhi khushi ki barsaat dhoond li, kaun kehta hai janab bol ke ya sunke ishq hota hai? Jaha Gazal hoti hai waha Rahagir hota hai.....