Isang salitang,
napakadaling sabihin.
Isang salitang,
kapansin-pansin
Isang salitang,
nais kumawala
nais lumaya
nais magpakita.
Upang marinig ng mga bituin sa langit,
isang katagang nais isambit.
Ngunit wala ang salita
kulang ang salita
hindi sapat ang isang salita
upang iparinig
upang ipaliwanag
kung ano ang nilalaman
kung ano ang nais isigaw
ng mga matang nangungusap
ng mga labing nanginginig
ng mga binting umiiyak
ng mga kamay na paos
na ang tanging magagawa lamang
ay tingnan ka sa malayo.
Na tingnan ang iyong likod,
habang marahang naglalakad
papalayo.
Habang ang salitang ito'y
sumusubok na labanan ang alon
ng mga kapwang salitang nanghihila
pabalik sa pampang
pabalik sa simula
pabalik sa kung saan siya naiwan.
Mag-isa
Walang karamay,
walang kasama.
Muli niyang sinubukang hawakan ang iyong damit
marahan niyang itinaas ang kanyang mga bisig
ngunit kulang.
Kulang ang isipin niyang maabot ka niya
dahil simula pa lang alam na niyang
hindi niya makakaya.
Dahil isa lang siya.
Isang salitang mahina
Isang salitang walang lakas
Isang salitang lumuluha
Isang salitang sumuko
sa pagdating ng kadiliman
at sa pag-alis mo
ng tuluyan.
Siya ang kakaiba.
Siya ang hindi pinapakinggan.
Siya ang mag-isa.
Siya ang luluha
Siya ang naiwan
at "Ako" ay siya.