Bas tu hi nahi hai...

Zindagi hai, usse jeene ka utsaah hai.
Naye raste, nayi raah hai.
Jo hai sab sahi hai,
Bas tu hi nahi hai.

Sapne hai, unhe sakaar karne ka junoon hai,
Santushti hai, sukoon hai.
Koi dukh nahi hai, koi dard nahi hai.
Bas tu hi nahi hai.

Khushiyan hai, khushiyon ki bahaar hai.
Kabhi jeet, toh kabhi haar hai.
Har pal khush rehna mene seekha kahin hai.
Bas tu hi nahi hai.

Prem hai, prem karne ki chaah hai.
Tu hi ishwar, tu hi allaha hai.
Jo hai sab tu hi hai,
Bas tu hi nahi hai.

Tu hai, fir bhi teri kami si hai,
Teri yaad me aankhon me nami si hai.
Tu hai, toh koi gam nahi hai,
Lekin, bas tu hi nahi hai.

Tere didaar ko tarasti hai aankhen, tarasta hai man,
Barasti hai aankhen, jese koi ghan.
Tu hai, toh koi darr nahi hai.
Lekin, bas tu hi nahi hai.

Tera hona meri sabse badi khushi, aur na hona sabse bada dukh hai.
Tere astitva ke ehsaas me hi sabse bada sukh hai.
Tu hai, fir bhi teri kami si hai.
Kyonki tu hai, fir bhi bas tu hi nahi hai.

Bas itni ichchha puri kar de,
Ki apni iss kami ko tu bhar de.
Iske siva kuchh aur chaha nahi hai,
Tu hai, fir bhi bas tu hi nahi hai.