Nang-aakit ang buwan
"Ang ganda" wika niya
Napatango at ngumiti
"Oo nga" sagot ko.
Sa itaas ang tingin ay ibinaling
Di maaninag ang hinahanap ng paningin
Makakapal na ulap ay tumatabon
Sa nga bituing gumagayak sa kalangitan.
Madilim ang paligid
Nakakabingi ang huning hatid ng ga kuliglig
Nakakakilabot ang ihip ng hangin.
Mata ay naipikit
Noo ay napakunot
Heto na, ramdam ko na
Mahapdi, masakit
Namamanhid, nangangati.
Lumapit pa siya ng kaunti
At pabulong na nagtanong "Okay ka lang?"
Napangisi, nainguso
Tuluyang naaninag ang kanyang kabuuan.
Tirik at namumula ang mga mata
Bumabati, nagwawala, humihiyaw
Nanindig ang mga balahibo.
Luminga-linga
Di mawari
Kung saan mapadpad.
Lumilinaw, nagbabalik
"Ayoko na, tama--"
Pagsasalita ay di naituloy
Bibig ay binusalan ng kung ano.
Paningin ay hinarangan
Pandinig ay nabingi
May mabigat na lumapat sa bungo.
Sumalampak ang katawan
Basa at mabaho
Malagkit, matigas
Tuluyang nawalan ng ulirat.