Hikbi ni Magdalena

Ang gabi'y nag-aalimupuyo
Tila lunatikong hinigop ng kalupaan.
Ang sigwang dumungis sa liwayway
Kailan ma'y di na aahon muli.
Ano pang kasarinlan
Ang gagatong sa sa silab ng dangal?
Mga prinsipyong di mawari
Na ang mga bagang nagsasayawan
Nilamon ng silakbo't
Naging abo.
Mga sariling ibinunyi
Ng baril at uniporme
"Para sa kalayaan!"
Ngunit yaong mismo'y
Pumatay sa supling ni Ina.
Nalalabi na lamang
Ang  mga huling bala,
Humihinga't naghihikapos.
Ako mismo ang bibiyak
Sa baril
Sa mga huling hininga nito.
Dito sa himlayan
Ng mga panaginip
Para sa Inang Bayan.