ISA. DALAWA. TATLO.

Isa, dalawa, tatlo.
Patuloy akong nagbibilang ng mga hakbang palapit sayo.
Apat, lima, anim.
Naguguluhan kung ako ba ay aamin.
Pito, walo, siyam.
Natatakot sapagkat hindi ko maamin, hindi ko alam kung anong dapat kong gawin.
Sampu, labing isa, labing dalawa.
Kung tama pa ba ang landas na tinatahak nating dalawa.
Labing tatlo, labing apat, labing lima.
Susuko na ba? O ipagpapatuloy pa?
Labing anim, labing pito, labing walo.
Pwede na ba nating ituloy ang pag-ibig na nabuo?
Labing syam, Dalawampu.
Ititigil na lang, sapagkat wala namang patutunguhan ang pag-ibig na ayaw namang ipagsigawan.

Dalawampu't isa, dalawampu't dalawa, dalawampu't tatlo.
Susuko na sapagkat ako ang talo.
Dalawampu't apat, dalawampu't lima, dalawampu't anim.
Pipigilin na ang pag-ibig na hindi na kaya pang aminin.
Dalawampu't pito, dalawampu't walo, dalawampu't syam.
Isusuko na kita, sapagkat sayo'y mayroon nang ibang nagmamay-ari.
At pag patak ng tatlompu.
Ako'y titigil na, at di na muling lilingon pa.

Pero hindi pa pala ako tapos magbilang. Hindi pa ako tapos sa paghakbang.
Pabalik sayo at sa ating nakaraan.
At sa dati nating pinagsamahan.
Tatlompu't isa, tatlompu't dalawa, tatlompu't tatlo.
Bakit di pagbiyang muli ang pag-iibigang ito?
Tatlompu't apat, tatlompu't lima, tatlomput anim?
Bakit ayaw mo pang aminin? Na mayroon ka pang nararamdaman sa akin?
Tatlompu't pito, tatlompu't walo, tatlompu't syam.
Titigil na ba at bibitaw? Kakalimutan na ba ang pag-ibig na minsa'y pinaramdam?
Apatnapu, apatnapu't isa, apatnapu't dalawa.
Hanggang dito na lang ba talaga tayong dalawa? Hanggang dito na lang ba talaga amg pag-ibig na minsa'y pinag-isa?
Apatnapu't tatlo, apatnapu't apat, apatnapu't lima.
O baka naman meron nang ibang nagpapasaya? Na dating ako lamang ang nakakagawa?
Apatnapu't anim, apatnapu't pito, apatnapu't walo.
Kung meron ma'y titigil na ako.
Apatnapu't syam, Singkwenta.
Sana'y nagkaroon ng kwenta, ang aking kwento sa iyong libro.

Hindi man nagtagal at maagang nagtapos. Patuloy kong hihilingin na sana'y huwag kang makakalimot. Na minsan sa buhay mo dumating ang kagaya ko. At kung sakali mang magkita tayong muli, ika'y ngingitian at sasambitin "sana'y masaya ka na, dahil yun lamang ang aking ninanais para sa iyo". At sa panahong iyon ay sisiguraduhin kong wala na akong pagtingin pa sa iyo.