Ka Julio at Elmer

Malalim na ang gabi ngunit laman parin ng lansangan ang  isang batang lalaki na payat at maliit at matandang lalaki  na nasa 40-50 ang edad. Masasabing mag-ama  ang dalawa dahil sa pagkakahawig nila.

Kasama ng kanilang kariton, maya't maya silang humihinto sa gilid ng kalsaada upang pumulot ng mga kalakal na maaari pang ibenta. Habang naglalakad ay nagkukwentuhan sila tungkol sa nalalapit na pasukan. Mababanaag ang pagkasabik ng bata sa unang pagpasok sa paaralan.

"Pag nakatapos ka, hindi na kariton ang imamaneho natin! Kotse na!"

"Oo tay, tapos titira tayo sa malaking bahay na may swimming pool."

Saksi ang mga butuin at ang buwan sa nabubuong pangarap ng mag-ama.
Ngunit muli silang hinatak pabalik sa reyalidad ng sunod sunod na putok.
Mabilis ang paglitaw ng mga naghahabulang grupo ng mga lalaki at mga pulis. Sa takot ay mabilis na tumakbo ang dalawa. Di bale nang maiwan ang kalakal na maghapong inipon.



Di pa sumisikat ang araw ay kumpol kumpol na tao na ang nagtipon malapit sa kinalalagyan ng kariton. Ilang oras naring hinahanap ng batang lalaki ang ama. Tila napalayo siya ng takbo. Sa wakas  ay nakita na rin niya. Kasama ang apat pa na lalaki. 


Pagbebenta raw ng shabu ang dahilan ng pagkamatay ng limang kalalakihan ayon sa bulung-bulungan ng mga tao. Normal na ang paghiga ng ama sa kalsada ngunit sa pagkakataong ito, hindi na niya magawang gisingin pa siya.