قصة قصيرة جداً

---

- قصة قصيرة ..

- إستيقظ على غير عادته .. مرهقاً .. يشعر بحزن فى صدره ولا يعرف له سبباً ..باغته صوت جميل ووجه أجمل ..

- صباح الخير ..

- صباح النور .. إنتى مين ؟

- إنتا مش عارفنى ؟؟

- بصراحة لأ .. إنتى دخلتى هنا إزاى ؟؟

- طيب قوم بس خد الدوا .. وأنا هقولك أنا مين ..

- دوا !!! هو أنا عيان ؟؟

- تناوله الدواء وهى تقول .. أيوة تعبان شوية .. بس إن شاء الله خير ..

- يأخذ ثلاثة أقراص من دواء لا يعرف ما هو .. ثم يكمل قائلاً .. إحكيلى بقى ..

- أنا مراتك ..

- إيه ؟؟ هو أنا إتجوزت أصلاً ؟؟

- إيه مالك ؟؟ إنتا زعلان إنك متجوز ؟؟ ولا زعلان إن أنا مراتك ؟؟

- لأ مش قصدى والله .. بس انا مش عارف ده حصل إمتى ..

- إحنا إتجوزنا من 3 شهور بس ..

- هههههههههه .. يعنى أنا فضلت عايش طول السنين اللى فاتت دى عازب وجيت إتجوزت وأنا عندى 45 سنة ؟؟

- أهو ده اللى حصل بقى ..

- بس إنتى أكيد إنسانة مميزة ..

- إشمعنا يعنى ؟؟

- اللى يخلينى أتجوز فى السن ده وبعد كل السنين دى .. يبقى أكيد إنتى إنسانة مميزة ..

- ترتسم إبتسامة حزينة على شفتيها ثم تكمل قائلة .. المهم .. إنتا لسه مفتكرتنيش ؟؟

- يصراحة لأ .. بس حاسس إنى أعرفك من زمان ..

- ما هو إحنا نعرف بعض من زمان فعلاً .. بس بعدنا عن بعض فترة ..

- صحيح إنتى مقولتيش أنا عندى إيه ؟؟

- زهايمر ..

- ( مبتسماً ) الحمد لله ..

- الحمد لله على كل حاجة طبعاً .. بس إنتا ليه شكلك مبسوط كده ؟؟

- أصلى فاكر إنى كنت زعلان طول حياتى من حاجة .. بس مش فاكر إيه هيا ..

- يعنى إنتا مبسوط دلوقتى ..

- أنا مبسوط إنى نسيت ..

- طيب ..

- مالك زعلتى ليه ؟؟

- أنا عايز أحكيلك على حاجة ..

- إحكى .. أنا فاضى متهيئلى ..

- شوف .. إنتا كنت بتحب واحدة من أيام الجامعة .. بس هيا مكانتش بتحبك .. وإنتا فضلت تحبها ومخلص ليها .. ووقفت جنبها فى مواقف كتير بس هيا مكانتش تعرف .. وإنتا فاتحتها فى الموضوع أكتر من مرة .. وفى كل مرة كانت بترفضك أكتر .. وفى كل مرة كانت بتجرحك أكتر وأكتر .. وإنتا كنت بتتمسك بيها أكتر وأكتر وأكتر .. وبعدين البنت دى إتجوزت .. وإنتا معرفتش تتأقلم مع أى واحدة غيرها لحد إنهاردة ..

- اممم ..

- إيه إنتا ساكت ليه ؟؟

- مش عارف .. بس حاسس من كلامك إنى إنسان عبيط ..

- ليه بتقول كده ؟؟

- ما هو الراجل اللى يقبل على نفسه الإهانة والمرمطة دى يبقى راجل عبيط ..

- وليه متقولش إنسان مخلص ؟؟

- فيه فرق ما بين الإخلاص و الإمتهان ..

- لسه بتقول كلام مبفهموش ..

- طيب أنا عندى سؤال .. لما أنا بحبها كده ومعرفتش أتأقلم مع حد غيرها .. إزاى إتجوزتك ؟؟

- مش عارفة ..

- طيب أنا فضلت طول السنين دى عايش من غير جواز .. هيا بقى عملت إيه ؟؟

- هيا إتخرجت وإشتغلت وإتخطبت وإتجوزت و ..

- (مقاطعاً ) يعنى مماتتش ؟؟

- لأ .. ليه بتقول كده ؟؟

- أومال أنا إتجوزتك ليه لما أنا بحبها جامد كده وهيا لسه عايشة ؟؟ شكلى مبيقولش إنى إنسان ممكن يتخلى عن مبادئه بسهولة .. يا إما إنتى إنسانة مميزة أوى فعلاً ..

- طيب إستنى لما أكمل كلامى ..

- ما أنا عارف الباقى .. إتطلقت وإكتشفت بعد كل السنين دى إنها مع الإنسان الغلط .. وملقتش حد يقف جنبها غيرى طبعاً .. وبعد كده رفضتنى تانى .. مش كده ؟؟

- مش بالظبط ..

- يعنى إيه ؟؟

- يعنى هيا مرفضتكش تانى ..

- فعلاً ؟؟

- أيوة فعلاً .. بس أنا عايزة أسألك على حاجة .. لو العمر رجع بيك .. هتعمل نفس اللى عملته ده .. ولا هتغير رأيك وتحب واحدة غيرها وتعيش حياتك ؟؟

- كفاية كلام فى الموضوع ده يا *** ..

- إيه ده ؟؟ إنتا إفتكرت إسمى !!! إنتا إفتكرتنى ؟؟

- بصراحة .. مش عايز أفتكر أكتر من كده علشان مزعلش منك تانى .. المهم إن إحنا دلوقتى مع بعض ...