Ako `yung tipo ng lalaking gagawin ang lahat mapasaya ka lang
Ako `yung tipo ng lalaki na mamahalin ka hanggang dulo
Ako `yung tipo ng lalaki na hahayaan ka sa mga bagay na naisin mo
Ako `yung tipo ng lalaki na susuportahan ka sa mga bagay na ikakaligaya mo
Ako `yung tipo ng lalaki na ihahatid-sundo ka sa bahay mo
Ako `yung tipo ng lalaki na makaka-usap mo sa pagsibol ng umaga at hanggang maging buwan ang tanglaw
Ako `yung tipo ng lalaki na igagaya ka sa tama at itutuwid ang pagkakamali mo
Dahil ako `yung tipo ng lalaki na hinding-hindi ka hahayaang lumagapak, mula sa `yong mataas na pagkakalipad.
Pero kahit na ako `yung ganitong tipo ng lalaki, alam kong itong tipo na `to ay hindi parin sasapat sa ikaw na may Siya.
Ikaw na mas malawak ang pagkaka-ngiti kapag kasama ‘Siya’
Ikaw na mas nagiging masaya kapag ‘Siya’ ang sumusuporta
Ikaw na mas pipiliin mong ‘siya’ ang maging tagahatid-sundo mo pauwi ng bahay,
Ikaw na mas pipiliin siyang kausap kaysa sa Ako na laging nandito para sa `yo
At Ikaw, Ikaw na mas mamahalin ‘Siya’
Oo, masakit pero ganito talaga
Ganito talaga kasi hindi magiging ganyan
Ang hirap pala… ang hirap palang kumilos sa mundong mayro’ng ‘Siya’
‘Siya’ na nagiging harang sa pagitan nating dalawa
Dahil kahit na kailanman, AKO at IKAW ay hindi magiging TAYO sa mundong mayro’ng SIYA.
--------------------------------------
Copyright ©2018
All Rights Reserved