Ako'y isang prinsesa
Dugo ko'y bughaw
Hango sa lahi ng magigiting
Lahi ng di pasusupil
Angkan ko'y nirerespeto
Tanyag ang ngalan ko
Kultura ko'y kabigha-bighani
Ipinag mamalaki kong higit
Malugod naming tinanggap
Estrangherong anak ng araw
Akala ni ama'y mabait
Ngunit sa huli kami'y ipiniit
Hindi lang isa, dalawa, kundi tatlo
Anak ng araw, puti at singkit
Puri ko'y napunit, bayan ko'y nagapi
Maharlika pa bang maituturing?
Natatangi ba pang masasabi?
Ako ngayong dayuhang pag-aari
Parausan, pinagkakakitaan
Sa ilalim ng gulong ng kapalaran
Tila wala ng pag asa, huli na ang lahat
Lumaban kami ngunit masakit
Napaslang ang bayani kong giliw
Tagumpay nila'y hindi man isang saglit
Korona ko'y wala na
Dangal ko'y naibenta
Perlas ng Silanganan
Ako pa nga ba?