Hanggang dito na lang ang damdamin,
alaala at kahapong atin.
Dito ang dulo, dito tapusin,
walang galit, buo na ang isip.
Ikaw sa akin ang paalalang
pikit-mata ma'y kayang humakbang,
nagturong takot ay takot lamang,
higit ang bukas na nag-aabang.
'Di tayo ang labang magwawagi
'Di tayo ang makakapagsabi.
Bibitiw dahil tayo ang mali,
at baka sakaling maaari
Hinihintay nang tamis ng bukas,
pag-asa, pagbangon, bagong lakas,
pag-ibig, higit sa ating wagas,
yakap, tahanan ng pusong ligtas.
Walang magagawa't nandito na.
Sandaling oras nati'y tapos na.
Mahirap man ay haharapin na.
Mula dito, sa'yo'y paalam na.