Ika'y isang munting uling sa loob ng pridyeder
Inilagay sa sulok sa likod ng mga Tupperware
At habang isa-isang nabubulok ang mga imbak
Nakikita mo rin silang nawawala't tinatanggal
Ika'y isang munting uling na mas matagal sa lahat ng naroon
Mabaybay mo pa kaya ang bawat bukas-sara ng pinto
Hindi ikaw ang matatamis na hanap ng maliliit na kamay
Hindi rin ikaw ang sunod na dudukutin sa sunod na menu ni inay
Ika'y isang munting uling na nakamasid sa lahat
Para bang gabay upang mapayapa dapat
Marami ka mang kasama t'wing kinsensas katapusan
Maiiwan at maiiwan ka kapag oras na nila sa hapag
Ika'y isang munting uling na walang daing
Bagkos sinisipsip mo ang masasangsang na amuyin
Kahit para bang nakapako sa iyong tungkulin
Hindi mabibigo kahit sinong magtangkang sa loob ay sumilip
Mananatili kang munting uling na hindi pipiliin
Dahil kailangan ka sa loob para pasanin
Ang baho ng iba, ang sikretong kabulukan nila
Para isaayos ang hanging ikakapinsala bago ka maiwan uli mag-isa