MALI KA

Mali ka.

Dahil darating at darating tayo sa puntong magsasawa tayo sa isa't isa.

Darating ang mga umaga na hindi na ako ang nanaisin mong makita. At masusundan 'to ng mga araw na hindi na ako ang gugustuhin mong makasama. Mabibingi ka na sa tunog boses ko. Mabubulag ka na sa kislap ng mga mata ko. At hindi na sasabay ang puso mo sa pag ngiti ng mga labi ko.

Darating ang mga hapon na hindi ka na masasabik sa paglubog ng araw, dahil senyales ito ng nalalapit ko nang pag-uwi.

Hindi ka na masasabik sa pag-uwi ko.

Darating ang mga gabi, na kahit sobrang lamig ay mas pipiliin mong magbalot sa kumot kaysa magkulong sa mga braso ko. Mas pipiliin mo nang talikuran ako kaysa pagmasdan ang payapa kong pagtulog, o baka hindi mo na naisin matulog sa tabi ko. Hindi malabong ganon nga ang mangyari.

Hindi na tayo mga batang paslit na dapat ituring ang pag-ibig na parang makulay na paru-paro, na kapag nahuli'y hindi na muling hahayaang lumipad pa sa malayo.

Ngunit mali ka rin.

Kung iisipin mong kapag nasa dulo na tayo'y iiwanan nalang kita. Na susuko nalang ako't hahayaan kitang kumawala sa gapos ng pagmamahal ko. Na hahayaan nalang kitang dumaplis sa palad ko.

Oo nga't hindi na tayo mga paslit at hindi na tayo ganon kasabik makahuli ng paru-paro.

Pero hangga't maari'y hindi ako papayag na uuwing talo sa pusta ng pag-ibig na tayong dalawa ang nakataya.

Dahil magkasabay mang umindak ang problema at tuksong tadhana Ikaw lang ang pipiliin kong makasama. Ikaw lang ang gugustuhin kong makasama.

Wag mong sabihin na hindi tayo darating sa puntong magsasawa tayo sa isa't isa.

Dahil mali ka.

Ito yung masaklap na realidad na kailangan tanggap mo na.

Magsasawa ako sayo. Magsasawa ka.

Pero wala kang dapat ipangamba Dahil kapag naroon na tayo at ang laààahat ay ubos na.

Pipiliin ko pa ring mahalin ka.