Pagbalik ng tayo sa ako

Maraming beses na sinubok ibalik,

Ang pagtingin mo sa akin ngayo'y natangay na ng hangin.

Ngunit wari'y wala na talagang pag-asa,

Ang maibalik ang dati nating pagsasama.

Gusto kong maniwala na lahat ay aking ginawa,

At alam kong halos lahat akin na ring tinaya,

Para di tuluyang mapalitan ang mahal kita ng paalam na.

Sa bawat araw na lumilipas,

At sa bawat pagkakataong pilit kong itinatama ang lahat,

Ay siya ring paglakad mong papalayo,

Palayo sa akin at sa mga pangarap nating nabuo,

Ilang taong paghawak kamay sa pagtingin at pag abot sa ating mga bituin.

Napagtanto mo bang hindi ako sapat?

O kaya'y hindi ako ang nararapat?

Ang sabi mo'y hindi ako ang dahilan ng iyong paglayo,

Ngunit hindi mapigil ang patuloy na pagtatanong ng isip ko,

Na kahit pagod na ay hindi pa ring mapigil ang isipin ka.

Na kahit gustong sumigaw ay waring walang tinig na lumalabas.

Gusto kong paunti unting ibalik ang tayo sa ako,

Ako na lang at ang mga pangarap ko.

Ako na lang at ang patuloy na pagmamahal sayo.

Mahaba ang proseso pero susubukan ko.

Susubukan kong maging masaya para sayo,

Susubukan kong intindihin lahat ng mga salitang binitawan mo,

Para sayo, para hindi maging mahirap at kumplikado.

Pero sana balang araw maging masaya na ako,

Hindi na para sayo,

Pero para na sa sarili ko.