Paruparong Sampid

Anong pagkilos ang maaari
sa bulaklak na ayaw magpadapo
sa isang paruparong tulad ko?
Ako'y maliit na insekto lamang
na may manipis na mga pakpak
at hindi kayang ipagtanggol
ang sarili sa maninila.
Hindi gaya sa isang ibon
na may giting sa paglipad:
isang manlalayag ng himpapawid.
Walang ganda sa akin kundi kulay
at nakakulong na kalayaan lang,
karapatan ko'y natatangay nga
ng isang ibong mandaragit.
Para saan pa ba ang aking buhay
kung sa pagtungtong lang sa dahon
ay pinagkakait na sa akin?