Kapag Ako Naging Hari

Isa akong hari

Haring mula sa paghihirap

Mahirap sa tronong pangarap

Pangarap ko'y di susuko

Susuko't luluhod ang mundo

Mundong humahamak sa'kin

Sa'king tagumpay at ganti

Gaganti ako sa lahat

Ang makita ko'y kalaban

Kalaban sila't di kaibigan

Kaibigan nga ay nawawala

Walang kaaway ang naglalaho

Maglaho man ang pag-ibig

Pag-ibig na di totoo

Katotohanang walang kabaliktaran

Bali-baliktarin man ang mundo

Pupugutan ko ang taksil

Taksil ay di makakatakas

Makakatakas lang ang hininga

Paghinga kapalit ng buhay

Buhay kong winasak nila

Sila: mga makapangyarihang halimaw

Halimaw nga'y turing sa'kin

Ako ay isang hari

Haring hindi na magpapasakop

Sasakupin ang bawat kaharian

Kaharian niyo'y magiging akin

Akin naman ang mundo

Mundo'y gagalaw sa'king gusto

Gugustuhin ko ang lahat

Lahat ng mayroong kayo