Siklab

Pusong pinagsakluban ng langit at lupa
Patuloy sa pagdugo tumitindi lumalala
Pag-asang ninais sa kamay kumawala
Para akong dinidikdik pinong pino nagwawala

Heto muli't nagdurusa ang sarili'y nanliliit
Tila pasan ko ang mundo na matinik, nanggigipit
Umiiyak, lumiliyab, umaalab, tumatangis
Nalulungkot, nayayamot, kabuua'y nagngingitngit

Inasam na pagbabago sa sarili ay nasaan
Tila kapalaran ay gumuhit ng kalabuan
Walang daloy na maayos agos walang sinusundan
Nililigaw ang sarili natahak ay maling daan

Itong buong pagkatao ubos na ang pagtitiis
Ang pasensiya sa daigdig agad palang numinipis
Agos na tahimik ay alon ngayong nagngangalit
Walang hindi kakayanin sandigan ko ay ako rin.