Huwag Kang Mag-Alala

Huwag kang mag-alala.
Oo't gusto kita pero di ako magmamakaawang magustuhan mo rin.
Hindi kita iiyakan.
Naririto lang ako bilang isang kaibigan,
Handang makinig, maari mong lapitan
Huwag kang mag-alala.
Aking nadarama'y maglalaho ring parang bula,
Hindi pa sa ngayon
Pero darating rin ang panahon.
Darating rin ang panahong hindi na ako matataranta sa tuwing nakakasalubong kita.
Ang panahon kung saan hindi na ako mapapangiti kapag maririnig ko ang iyong pangalan.
Hindi na rin ako mag-aalala kung ano ang aking hitsura sa tuwing nariyan ka.
Hindi ko na rin poproblemahin lahat ng kilos ko na maaaring makakapainis sa'yo.
Hindi ko na rin ipapadarama sa'yong mahalaga ka,
hindi ko na rin ipapakitang ako sayo'y nag-aalala.
Darating rin ang panahong iyon.
Huwag kang mag-alala.
Nakikipaglaro lang ako sa mga salita.
Wala lang 'to ano ka ba.
Huwag kang mag-alala.
Makakalaya rin ako mula sa'yo.
Makakawala rin ako sa pag-ibig na tanging ako lamang ang nahuhulog at hindi mo sinasalo.