Kung Sakali

Kapag dumating sa punto

Na ikaw ay yumuko

At ninais mo nang lumayo,

Hindi ako susuko,

Hahatakin kita papalapit sa piling ko.

Pakinggan mo ang tibok ng puso ko,

Nawa ay umabot sa'yo ang bugso nito.

Mahal ko, narito lamang ako.

Kaya Ginoo,

Huwag kang magpapatalo

Sabay nating lalagpasan ang sakit at pasakit ng mundo

Hanggang sa marating natin ang dulo

Narito ako...

Kakampi mo...

At palaging nasa tabi mo.

Sa akin mo ibuhos ang galit

Ng puso mong naninikip.

Sa akin mo idaing,

Ang mga salitang hindi nila piniling marinig.

Sa akin mo ihagis,

Ang iyong paghihinagpis at pagtitiis.

Sapagkat mahal ko,

Hindi lamang sa saya nasusukat ang pag-ibig ko.

Hindi sa kilig nabubuhay ang "tayo".

Hindi salapi ang pundasyon

Ng matatag na relasyon.

Kundi sa kung paano natin sagipin ang isa't-isa

Sagipin kapag nalulunod na sa problema,

Sa lungkot.. Bakit hindi pa mawala?

Kaya kapag dumating sa punto

Na ikaw ay yumuko

At ninais mo nang lumayo,

Hindi ako susuko,

Hahatakin kita papalapit sa piling ko.

Pakinggan mo ang tibok ng puso ko..

Nawa na makarating sa'yo ang bugso nito.

Mahal ko, kakampi mo ako.

Sa akin ka dumantay

At hawakan ang aking kamay

Sabay nating palayain ang lumbay

Habang sa ganda ng langit — tayo'y nakatunghay.

Kaya kapag dumating sa punto

Na ikaw ay yumuko

At ninais mong lumayo...

Hindi kailanman ako susuko.

Pangako.