Naam(Part-5)

KHUSHI

Ghar pahuch ke bus intezaar raha, voh phone karega or humesha ki tarah chilayega, “kaha thi? Bola tha ghar pahuch ke call karneko, sunti nhi ho meri kabhi bhi.” Or mai usko bholi awaz meh manaungi. Lekin iss baar uska phone nhi aaya. Do teen baar tho aisa laga ki jaise puri duniya meri hassi si uda rhi hai, call aaya, lekin credit card wale ka. Maine uspe chilaya or keh diya ki agli baar vapas galti se bhi phone kiya tho ghar pe ghus ke marungi or rakh diya. Kya pata, voh call kareh or busy aaye, aisa nhi hona chahiye na...

Din ke haftey, haftey ke mahiney hogaye. Uska call na aaya. Ek baar tho maine khud uska number daalke dekha. Switch off aya. Mere pass abb do raastey the. Pehla, uske ghar pe phone karke naya number nikalwau. Dusra , jaane du.

    Maine dusra chuna. Khud ko kitabo meh aisa duboliya ki vakht pe pankh lag gaye. Dosto se kuch din baat kya na hui, sab anjaan se bann gaye. Kuch din baad maiine dusra pg le liya. Or meri mulakat hui Anju se. Voh bachi thi, char saal ki, dheere dheere jaan ban gayi. Din kitna bhi bura jaata,Anju har subha apni mummy ke haath bheji chai dene aati or badlle meh humesha ek kahani sunn ke jaati. Usko dekh ke Khushi phirse hassne lagi.